Back to the Farm....

Mi Rugge isch einigermasse wider ok und i bi wider meh a dr Farm. I hilf zwar immernonig bim Team zmache, aber dürführ cha ni d „Morge arbet“ mache und bi dä Safaries mithelfe.

Es isch jo scho fascht mitti Februar (die Zyt lauft soooo schnell) und eigentlich sötte mr die „-40C Wuche“ scho hinter euis ha. Aber fo dere isch wit und breit no nüd sgseh. Mir hei Temperature, do wird’s eim richtig warm um s Herz. ;) Hei mr e wulchelose Himmel, wird’s scho mol -30C aber sus si mr so bi -10C bis -20C. Mi freut das natürlich und i ha chli d Hoffnig, dass die „-40 Wuche“das Joor usfallt. Mir werdes gseh.

Februar, das bedütet au Multidays Safaries. Mir hei no nie so vil Multidays Safarie Buechige ka, wie das Joor. Sit drei Wuche si ununterbroche Hünd unterwechs richtig Norde und wider zrug. Und natürlich au Guides und Pasi. Do i nid lang cha Autofahre isch dr Pasi sneuie Taxi um Touriste vom Flughafe abzhole (letscht Joor bi ni 3 mol uf Kittilä und zrug gfahre (150km)). Do d Multidays Safaries im Pasi si Ufgobebereich isch, si si nid soooo dureorganisiert wie die däglichi Arbet an dr Farm (Anna’s Ufgobeberich). Do chas den scho mol passiere, das er s Fuetter für d Hünd vergisst oder d Fressnapf… I find das nid so schlimm, denn das bedüttet mir chöne chli mit dä Snowmobil i dr gegend umeheize. :)

No e chline Werbefilm.... ;)

http://www.youtube.com/watch?v=RJeECp5eRaw

Schnee, Schnee und nomol Schnee

I dere Wuche ha ni glaub nie d Sunne gseh, den es isch immer Bewölkt und es Schneit die ganz Zyt. Das isch jo zwar schön, aber es bedütet sehr vil Arbet für uns (nid für mi, den i ha es Verbot für jeglichi körperlichi Arbet). Ab und zu döff i chli use go Snowmobil fahre (damit i nid ganz duselig wird). Sus isch die Wuche recht ruhig verbigange. Hei e paar Problemlis ka mit em „Track“ (Weg), zum Teil wüsse si immernonig wo si dure müen (langsam unverständlich) und zum Teil chöne si immer nonig Snowmobil fahre im Neuschnee….

Geschter hei mr s erscht mol die 6 Monatige Junge in es Team gsehts und hei se 2km lo renne…. Si hei das Meisterlich gmacht. Das heisst, mir hei e Trainingsesion gmacht mit dä „Non-runnig“- Hünd. Zwei Teams mit alte oder länger verletztä (wider gsunde) Hünd und je ei chlises Pups. Die alte erfahrene Hünd duen die chline erzieh. Sie lehr ihne, wie si sich verhalte zhei im Team und wie bzw. wo sie müen renne. Das isch sehr herzig si, so die Junge mit dä alte Öpis……

Ok, es isch jetzt wider e Wuche vergange und i ha leider wider schlechti Nochrichte. Mir hei nomol drei Hünd verlohre. Es si alli chli shockiert. Do a eim Morge euises Maskotli vo dr Dawi Farm Tot im Chefig gläge isch (alwe Inneri Bluetige), Riku wo mr die letschte 3 Wuche, versuecht hei, mit alne Mittel, vo sim Niereversage zrette, hei mr müesse ufgeh, do s nid besser worde isch und si hei sich den Entschide ei Hund zerlöse wo sit jooore Hutproblem ka het und nume glitte het.

Alles i zwei Wuche, das got sho chli a Dniere. Den öber isch immer s Arme Schwein, wo se muess verbuddle, zum Glück ha i mi chöne drfo drucke!

Und den zum Schluss für mi e Gueti Nochricht, ei Hund kriegt Jungi (alwe churz befor i wider hei gang... :) (d Anna isch natürlich nid so begeischteret, den d Farm isch scho recht voll... ) Jupppiiiii........ :D

e zwei Jöhrige Film, vo dr Arbet wo i do so mach... 

 http://www.youtube.com/watch?v=Pwd_s8zkV2I 

Bis bald

Halbzyt!!

So, jetzt hei dr lang müesse uf e neue Bloggitrag warte. Dr Grund? I ha mi verletzt und bi nid ganz zu 100% isatzfähig. Me nennts Hüftglänkenzündig! (Das isch den e scheiss!!)

Wie das passiert isch? Kei Ahnig, ha amene morge (vor fascht 2 Wuche) die Junge gfüheteret und das Chäfig isch so nidrig, aso bi ni öbe für 15min in ere gebückte Haltig gsi. Den het dr Rugge langsam afo weh mache, churzi Zyt spöter ha ni dä Hünd s Gstelltli nüm chöne alege. Bim Zmittag esse ha ni scho nüm gwüsst wie ni söll hocke. So isch es den widergange, bis i am nögste Dag (nachere 45 Minütigi Autofahrt) fascht nüm ha chöne laufe, geschweige den hocke. Langi Red churze Sinn, i „hock“ im Moment im Hus, mach jeglichi Computerarbet (liggend im Bett) und bi zueständig für d Verplägig. Es git Däg, do stoh ni vom Morge am 8i bis zobe am 5i i dr Chuchi. Do d Wäschmaschine defekt isch bi ni beschäftig mit Abwäsche, Choche, Abwäsche, Choche usw. I würd fascht sege, so vil wie i in dr letscht 2 Wuche kocht ha, ha ni alwe s ganze letschte Johr nid!

(Müend jetzt aber nid meine i chum as 5 *- Choch hei…. Den mini Zuetate si immer recht beschrenkt…)

I hoff natürlich, dass i so schnell wie möglich wider usse cha, den im Moment isch es so schön agnehm warm.  Mir hei Temperature -1 bis -10. Für euis si die Temperature natürlich richtig supper (keini Händ wo dr abfriere!), aber leider Schneits au dem entsprächen und das isch für euis überhaupt nid toll und scho gar nid für d Hünd. (Und au nid für s Eis uf dä See). S Problm fo euis; d Snowmobil blibe oft stecke (grab mol es Snowmobil us in 1m Neuschnee!). S Problem wo d Hünd hei; 160kg dure Neuschnee zieh. Und s Problem wos Eis het, es wird wider zu Wasser!

Jupi, das git sicher e supper nögst Wuche! We will see…..

Den chömer no zu öbisem ganz trurigem. Hüt isch euisi chlini (112 Hünd) Haskiefarm um 2 Hünd ärmer worde. Das heisst, mir hei mit schwerem Herz zwei supper Hünd zu grab treit (sprich wörtlich, den in Finnland, dued me sini Hünd selber vergrabe, au wenn sie bim Tierartzt igschlöflet worde si (für das dued me im Summer scho löcher grabe)). D Fonina het chrebs ka, isch aber scho recht alt (12i), d Anna und dr Pasi si scho sit längerem am überlege öb si se söle Operiere. In dere Zyt, het si natürlich döfe im Hus ihri schöne Däg verbringe (wie das alli döfe, wo schwerer verletzt si). Dure dumme Fehler isch si aber in ihrer läufigkeit an es Männli grothe. Sie isch schlussendlich an Gebermuetterentzündig gstorbe! Si isch e so e süesse Hund gsi. Dr Pasi het den am Obe gmeint, dass sie eis Junge (mir he zurziet Jungi uf dr Farm, wo mr usglehnt hei) palte, wo eis Aug blau und s ander brun het als Errinnerig/ Adenke an d Fonina (sie het au blau/brun Auge ka)“.

Mit söttige Ussage, weiss me eifach, dass me uf ere supper tolle und spezielle Hunde Farm glanded isch und me wünscht sich, dass doch alli Haskyfarm Bsitzer e soooooo es grosses Härz händ für ihri Hünd. Den d Realität gseht leider ganz anderscht us!!

Easy Peasy Woche

Ok, die Wuche isch mega easy gsi. Nid vil Safaries, usser a einem Dag, viel „sleep in’s“ und vil z esse. Das alles hei mr im Pasi zverdanke ka. Denn d Anna isch im Moment usser Landes, das heisst er isch „verantwortlich“. Do dr Pasi e easy finnländer isch und ein mol im Joor gniesst, chli sini Rueh vo euis zha, het er euis so spot wie möglich inebeorderet (10.00) und so frie wie möglich hei gschikt (vor dä 8i, unglaublich oder?;)

Aber mir hei natürlich glich vil gschaft und do mr dr ersti Tag ka hei mit unter -25 C, isch es doch astrengend gsi. Den so 5-6 Stund in -25 C umestoh, brucht doch vil energie….

Velicht mol e chli infos über d Lüt wo do si. Aso so im Allgemeine hei sis nid so mit Auto- und Snowmobil fahre und au nid so mit dä Safariesrutene. Do obe in Finnland lehrt me alles chli uf die Harti-tur (wie das dr Martin usdruck het, nach dem mir (er und ich) FASCHT zwei Schlitte verlohre hei, drei Volontärs sich verfahre und es 14 Hunde-teem zwei mol umdreiht hei und euises Auto 3 Wuche lang ohni Heckschiebe umegfahre isch).

Dir gsehnt, isch e chli e chaote Gruppe. Aber alles mol langsam. Aso das mit em Auto isch scho bedenklich, si hei i dem Winter scho 2 Autos zu Schrott gfahre (aso die Engländer mit Schnee uf dr Stross isch e Sach für sich) und ebe, churz bevor i cho bi het dr Einti, d Heckschiebe gschlisse. Mit dä snowmobils blibe si im Moment oft stecke und müens wider usgrabe.

Aber s lüschtigste isch, das mit dä 14 Hünd. Also am Dag bevor i mi letschti Freidag ka ha, bi i und dr Martin (nid Leadguid) uf e Safarie wo übere Stross führt (gefährlich!). So ha i bim erstemol überquere e Fehler gmacht, i ha gmeint: „au cool dr linki snowmobiltrack isch jo offe, zum d Teams z überhole“, ha aber erst nach dem i über es Hügeli gfahre bi gmerkt, dass i dem Summer doch recht vil Strücher gwachse si und i mit dem Weg i nid död ane chum wo ni sött. So ha ni s Snowmobil dreiht, durch das ha ni Zyt verlore und bi z spot a dr Stross acho, alli Teams si scho sicher über dr Stross gsi und witer gfahre, so au Martin. Er het churz vor em See dänkt „au cool do hets e Snowmobiltrack wo ni alli Teams cha überhole“. Er het den au erst spot gmerkt „au schitt, do in blib i stecke.“ So isch es au cho, er isch mit em Snowmobil in 1.5m Schnee blibe stecke und hets müesse useschiebe. Do i jo wider bi de Teams gsi bi, isch dass alles nid so es Problem gsi für Touriste (die hei gar nüd gmerkt…;) Und so isch das den witer gange, i ha no schnell uf em See bekannschaft mit Wasser gmacht und den hei mr schoh die halbi Safarie sicher überstande ka….  ;) Vo dr andere Helfti vo ni gar nid ah z verzelle, s bescht isch immer, nett Touriste alächle und so due, wie wenn alles in beschter Ordnig wär (zum Glück kenne d Hünd dr Weg!;)

Die Safarie isch natürlich lang und breit immer wider zur Sproch und Spot cho. Aber nid lang den scho am nögste Tag hei drei Volontärs ä 14 Hundeteam zum Mukki usefahre müesse, wo Multidays-Safaries Touriste gwartet hei. Es isch dr Eifachschti vo dä eifache Wäg. Zerscht fahre sie richtig, plötzlich meint die einti „hei, halt, das isch doch dr Weg zum 20km Tour“. So dreihe si zu dritt (ein uf em Schlitte) respektiv zu zweit es 14 Hundeteam (normalerwies brucht me so vil Lüt zum es 6 Hundeteem zdreie). No schnell nebebi, es 14 Hundeteem isch öbe 14m Lang.  Mach mol e Kreis zu zweit mit 14 hund innere Linie… ;)

Uf jedefall hei si das gschaft, fahre zrug neme dr anderi Abzwiger, fahre witer und merke den, „au schiesse, dass wär richtig gsi vorher“. Und so hei si das Team zum zweite mol dreiht!! Dr Brüller…. :D (i hoff i bechum s Video vom einte… ;)

Wie scho gseit es bitzeli Chaos, aber d Tourischte liebes und das isch jo d Hauptsach, und mir hei Zobe öbis zum lache…..

Do no es paar Föteli vom Himmel, leider ha ni d Sunne immernonig gshe, aber es isch churz bevor.... :)

 Nach 4h in -25C....

Ersti Woche überstande, check!

So, die ersti Wuche ha ni überstande. Muess ganz erlich sege, am Afang ha ni chli mühe ka, mi wider i das Hasky lebe zrecht finde. D Däg si eifach ewigs lang, do chasch no so früeh (17.00) afo s Fueter parat mache, du chunsch glich erst am 9i odr 10i hei.

Jetzt hock i im einzige Resterant in Hetta wo me e astendige Renntierbörger mit guete Pommes bechunt und dänk über die letscht Wuche noch.

Was isch alles passiert? Hmm, i ha gmerkt, dass Touriste i dem joor nid würklich gschieder worde sie, dass me au scho im Januar uf em See mit em Snowmobil cha versuffe, und das d Hünd immerno glich „chli“ si, wie letscht joor (Rugge weh).

Im Moment hei mer sehr agnähmi Temperature, so um die -10 bis -25. Das heisst du chasch guet mit dr Hellihansen uf der Farm umedüse, also alles recht easy. Fürs Snowmobil isch es den aber scho chli zchalt, denn bruchsch die dicki Jage. Über die Temperature bi ni aber sehr froh. Do i mir dähei scho recht dr chopf zerbroche ha, wie i das mach mit dere chelti (ha mr dähei scho dr arsch abgfrorre ka). Aber isch immer luschtig wie dass die andere mache (Englender, Australier), die si scho lang do obe und friere sich immerno dr arsch ab. Die erste hei au scho die erste Froschtbülle hinter sich, dass cha jo luschtig werde mit -40……

Das mit em Wasser uf em See isch hingege chli bedenktlich. Isch nid so geil, wenn fahrsch und hinde sink dies arsch ab vom Snnowmobil, do griegsch den scho chli e höchere Puls J (und gisch vollgas!)

Mir hei au scho die Wuche churzfristi die Ersti übernachtigs Safari ka und sie zobe zum gnuss cho, d Hünd vom Wildernisshütli zrug i d Farm zfahre. Do drei Teams unterwächs gsi si und mir nume zwei Volontärs, hets den e riesigs Team vo 14 Hünd geh. Dr Schlitte isch regelrecht zur Farm zruggfloge…

So das wärs au scho wider…

Do ha ni no e Link vom Pasi (Chef), söll zeige wie me sich fühlt i dr Dunkelheit in Lappland…(Nid e so, wie dass alli meine..;)

http://www.visitfinland.com/article/the-unexpected-allure-of-lapland/

Uferstoh vo mim Reise- Blog

Fascht nach genau 1 Joor wird mi Reise-Blogg wirder zum lebe erweckt. Jupiiii…..

Nach dem mi e Kolleg (wo ni in Finnland kenne glehrt ha) druf ufmerksam gmacht het, dass i jo scho s vierte mol uf Enontekiö Reise, (Ha ni zerscht natürlich wehement bestritte, aber nach kurzem nochdenke und zemmezelle, bi ni au druf cho ;) erst bewusst worde, dass i jo eingentlich fascht e Heimreis atritt. So reis i tatsächli zum vierte Mol uf das so schön abglegene Hetta zu dene supper süesse und herzige Hünd… :D

Schnell es update. Denn dir Froget euch jetzt velicht, „hä, wiso den s vierte mol? i dä früenere Bloggiträg stoht gar nüd!“

Genau, den mi letscht Itrag isch vom afangs Januar 2012. Aber bis nume död ane bi ni scho mol hei und wider anegreist, au wenn so churz gsi isch, dass es fascht nid worh isch. Aber im Januar bi ni den „Planmässig“ hei gfloge, hät sötte ä Abschied für immer si (oder wenigstens für länger, als es den schlussendlich gsi isch) I bi eigentlich glücklich hei gange, denn nach 1.5 Mönet sich der „Arsch ufriesse“ und das ohni ei Sunnestrahl im Gsicht zspüre, ha ni den scho langsam gnueg becho (si immerhin 5 Mönet gsi, im Ganze). So bi ni hei, chum wider im Alltag, het mis Fieber wider pack und do d Anna (Chefin) weiss wie me d Lüt zückerlet zum wider zrug cho (weniger langi Däg und Multidays Safaries) bi ni nach 1.5 Wuche wider im Bsitz vomene Flugticket nach Kittilä gsi. Das mol aber „nume“ für e Monet, den irgenwenn muess me jo au wider chli Geld verdiene.. ;) Und so isch das scho s dritte mol gsi….

Velicht muess me do no drzue sege, dass i jedesmol e anderi Route gwählt ha (oder müesse wähle…. ;), sus wärs jo langwilig…

I bi eimol über Zürich – Helsinki – Kittilä – Hetta (Bus) / Hetta (Bus)– Rovaniemi – Helsinki – Zürich, wider ufe über Zürich - - Helsinki (Nacht Zug) – Rovaniemi (Bus) – Hetta und ganz langwilig wie bim erstemol ufego über Helsiki – Züri hei. Die Tradition will i jo bim Viertemol nid breche und so hock i jetzt in Copenhagen am Flughafe und wart uf mi Witerflug uf Kittilä. Aslo will öber mi cho bsueche, kei Problem, i weiss jeglichi Routene. ;)

So jetzt si alli wider uf em neuschte Stand und i hoff dir heit spass bi däm bogg lese, (i probier en chli informativer zahlte als letscht joor (mit fakten und Filmen.. ;)) 

Aber i wird nid täglich öbis poste, so wie das e gwüssi Person gern hät, au nit miteme Ipone app. ;)

Enjoy

Raya

 

Letschti Sunnestrahle für die nögste 1.5 Wuche... ;)